Ngjarjet e javëve të fundit po paralajmërojnë zhvillime të forta në skenën politike dhe atë të drejtësisë. Brenda shumë pak ditësh, kanë ndodhur mjaft zhvillime, të cilat po japin sinjale se ndërkombëtarët kanë nisur lëvizjet për t’i dhënë fund pandëshkueshmërisë 30-vjeçare në vend. Dosje si “Gërdeci”, “21 Janari”, vr.asja e Artan Santos u rihapën. Adriatik Llalla u dënuan me burg. Presidenti po shkarkohet, ndërsa ish-kryeministri Berisha u shpall “non grata” nga SHBA. Pra duket sikur po nis një epokë e re dhe kushdo që i ka shpëtuar ndëshkimit këto vite do të japë llogari. Sinjalet janë forcuar akoma dhe më tej nga ambasadorja amerikane Yuri Kim, e cila dje ka takuar kreun e SPAK, Arben Kraja dhe shefen e Byrosë Hetimore, Aida Hajnaj. Fokusi ka qenë pikërisht lufta ndaj krimit të organizuar dhe korrupsionit. Ambasadorja përmes një deklarate shkundi klasën politike shqiptare, duke e bërë të qartë se ka ikur koha e pandëshkueshmërisë.
“Sot, Ambasadorja Kim u takua me Kreun e SPAK Kraja dhe Drejtoreshën e BKH Hajnaj për të diskutuar rezultatet e suksesshme të SPAK dhe sfidat me të cilat ata po përballen në vitin e tyre të parë. Shtetet e Bashkuara mbështesin rolin e rëndësishëm që SPAK ka në zbatimin e suksesshëm të reformës në drejtësi. Zhvillimi i vërtetë po ndodh. SPAK e nisi vitin 2021 me rezultate të vërteta nga çështje të mëdha. Ndërsa mesi i vitit 2021 po afron, Kreu Kraja dhe Drejtoresha Hajnaj i rikonfirmuan Ambasadores Kim se puna po vijon intensivisht në SPAK. Pavarësisht sfidave dhe sulmeve, SPAK është përqendruar për të treguar se askush nuk është mbi ligjin. Ata vazhdojnë të hetojnë krime të ndryshme, të organizuara e të mëdha, korrupsionin dhe krimet zgjedhore, dhe janë të vendosur për t’i dhënë fund pandëshkueshmërisë. Askush nuk është mbi ligjin”, tha ambasada.
Lidhur me zhvillimet e javëve të fundit ka folur dhe avokat Spartak Ngjela. Edhe ai shprehet se tashmë po jepen sinjale se do të nisë goditja e korrupsionit të lartë shtetëror. Sipas tij, kryeministra, ministra, deputetë e funksionarë të tjerë kanë qenë të zhytur në afera.
“Autorët e krimit shtetëror të madh e të gjatë në kohë, po shihet qartë se janë futur sakaq në psikozën e tyre kolektive të dominuar nga frika e akuzës penale. Psikoza kolektive është fenomen i një eksitimi kolektiv, i cili vjen nga një gjendje lufte. Në rastin që po e sjell këtë në Shqipëri, është lufta e nisur antikrim me çështje konkrete dhe me individë konkretë, e cila i ka kaluar këta në një psikozë kolektive frike; të gjithë të inkriminuarit. Dhe këta janë shumë: janë kryeministra, ministra, deputetë, etj. Por janë dhe një numër gazetarësh e të ashtuquajturish analistë që kanë qenë në anë të krimit; por dhe një plejadë bashkëpunëtorësh me krimin shtetëror, që kanë marrë pjesë në transaksione korruptive: kushërinj, klientë, kompani tregtare, banka që kanë kryer transferta fiktive, individë që janë bashkëpunëtorë në pastrimin e parave, etj”, tha Ngjela.
Ai ka përmendur më tej dosjet që kanë nisur të hapen, ndërsa e cilëson jo rastësor shpalljen e Berishës “non grata” në këtë periudhë. Sipas avokatit, e gjithë kjo po vjen falë amerikanëve.
“Proceset që kanë filluar janë: çështja e Gërdecit, çështja e “21 Janarit”, shpallja “non grata” e Sali Berishës dhe gjithë familjes së tij për korrupsion dhe krim ekonomik; llogari bankare të identifikuara nëpër banka të pikave off-shore në shuma marramendëse; dhe janë gjithashtu edhe çështje të tjera të këtij niveli, të cilat kuptohet se do të dalin në pah hap pas hapi”, tha ai.
Diskutime rreth kësaj post