Çfarë po paralajmëron SHBA me shpalljen ‘non-grata’ të Berishës? Avokati i njohur tregon kush rrezikohet dhe befason me atë që thotë për Metën

Juristi Sokol Hazizaj komentoi sot në emisionin ‘Breaking’ Komisionin Hetimor të ngritur për shkarkimin e Presidentit Meta. Ai u shpreh se “vendimmarrja e Kuvendit sot lë për të dëshiruar”.

“Kuvendi duhej të kishte mbyllur punimet një muaj para zgjedhjeve të 25 prillit. Katër muaj përpara përfundimit të Kuvendit një komision i tillë nuk mund të funksionojë”, – tha juristi.

Hazizaj ngriti pyetjen nëse “Kuvendi është në kushtet ligjore për të marrë një vendim për shkarkimin e Metës apo komisioni hetimor është i legjitimuar?”. Sipas tij, jo.

Juristi shtoi se nuk lidhet vetëm me ngritjen, por edhe me funksionimin e tij.

“Ligjërisht nuk mundet. Gjykata Kushtetuese do ta argumentojë e arsyetojë këtë. Ne duhet të ndajmë mirë në arsyetimin tonë pasojat që ka sjellë jo në kuptimin moral, por shprehjet në kufijtë e një akti të cilat janë me pasoja të karakterit ligjor apo moral. Ky komision nuk mendoj se mund ta ndajë mirë këtë, pasi është komision politik. Nëse do të ishte ligjore, duhej të realizojë një këshillë të mirë jo për këtë president, por edhe për ata që vijnë”, – tha juristi.

Sipas tij, Meta ka qenë president i ashpër politikisht, por nuk ka kryer vepër penale.

“Meta ka qenë i anshëm politikisht, se sa të ketë kryer ndonjë vepër penale. Duhet t’ju shpjegoj se ndarja midis një veprimi me karakter penal dhe moral, sillet përmes pasojës që është rrjedhoja. Sa kohë që dispozita referuese e Kushtetueses pranon se aktet e sjella nga presidenti nuk mbajnë përgjegjësi për aktet, në kuptimin ligjor nuk përbën faj penal. Mënyra e sjelljes brenda kufijve kushtetues nuk është penal. Nëse do të kishte sjellë ndonjë pasojë, do të ishim në vepra penale”, – tha juristi.

Ndërsa në lidhje me shpalljen “non grata” të ish-kryeministrit, Sali Berisha, nga Shtetet e Bashkuara të Amerikës, Hazizaj tha se “ky është një mesazh për të gjithë”.

“Vendimi i SHBA për Berishën është mesazh për të gjithë, jo vetëm për Metën. Për të gjithë ata që kanë qenë menaxhues të fondeve publike. Është mesazh shumë i madh. Një format i tillë përbën risk për këdo që liderizohet në Shqipëri, ka marrë përsipër të menaxhojë fondet publike”, – tha juristi.