Zenel Hoxha, themelues i degës së parë të PD në Tiranë në 1990 shprehet se kryedemokrati Lulzim Basha po mban peng Partinë Demokratike dhe po tërheq zvarrë demokratët.
Zenel Hoxha, tha se Basha duhet të pranonte përgjegjësinë e dështimit si një lider me vizion perëndimor. Sipas tij PD do të vazhdojë të jetë po aty edhe nëse Lulzim Basha largohet.
Reagimi i plotë:
“ESKURSIONI (TURI) I TURPIT
Në vend që të jepte dorëheqjen e parevokueshme dhe të pranonte përgjegjësinë e dështimit më të turpshëm në historinë 30-vjeçare të PD-së, Lulzim Basha vendosi të zgjasë agoninë duke ndërmarrë një tur turpi. Në Tiranë, në Durrës, në Lezhë, demokratët që punuan pareshtur për të sjellë ndryshimin dhe që u lanë në baltë nga mungesa e vizionit të drejtuesve, sot detyrohen nga ky kryetar në largim që të buzëqeshin dhe të sillen sikur humbja nuk ka ndodhur.
Në vend që të largohej me dinjitet duke ndjekur modelet perëndimore të cilave u janë referuar gjithmonë demokratët e vërtetë, Lulzim Basha po e mban peng PD-në dhe po i tërheq zvarrë demokratët nëpër turin e humbjes. Mbështetur nga individë pa histori dhe kontribute në Partinë Demokratike, sot ai po përpiqet të uzurpojë Partinë Demokratike.
Lulzim Basha mund të tregonte guxim dhe lidership duke bërë një mea culpa dhe u tërhequr, por ai preferon të hiqet si zot shtëpie dhe të tërheqë vëmendjen me një tur akuzash ndaj armiqve të vërtetë dhe imagjinarë, a thua se shqiptarët dhe demokratët kanë ende kohë për të humbur.
Pas tetë vitesh opozitë, Partia Demokratike do të vazhdojë të vuajë pafuqinë përballë kësaj qeverie për hir të rrugës pa krye ku e drejtoi strategjia e gabuar e Lulzim Bashës. Pas tetë vitesh, shqiptarëve nuk iu ringjall dot shpresa dhe ai duhet të mbajë përgjegjësi personale për këtë. PD ishte aty përpara se të vinte ai dhe do vazhdojë të jetë dhe shumë kohë pasi ai të ikë.
Zenel Hoxha
Themelues i PD
Anëtar i Komisionit Nismëtar
Kryetar i parë i Degës PD Tiranë
12.12.1990”.-shkruan Hoxha.
Diskutime rreth kësaj post