PD tjetër denoncim në SPAK, Tabaku: PS ka blerë vota duke përdorur fondet e rindërtimit, në 4 muaj janë dhënë 125 mln euro

Deputetja e Partisë Demokratike, Jorida Tabaku ka vijuar me denoncimet për vjedhjen e votave dhe manipulimet në procesin zgjedhor. Ditën e djeshme ajo bëri me dije një tjetër rast ku pretendohet se është tjetërsuar vullneti i qytetarëve.

Tabaku tha se në vetëm 4 muaj nga 1 janari deri më 25 prill 2021 janë dhënë 125 mln euro transferta nga fondet qeveritare në 11 bashki të vendit për rindërtimin e banesave të dëmtuara nga tërmeti. Sipas saj janë rritur disafish fondet për të ndikuar votën në familjet që përfituan.

“Ditë pas dite ne po publikojmë gjithnjë e më shumë fakte, prova dhe të dhëna për vjedhjen më të madhe të zgjedhjeve në histori të kryer nga regjimi Rama-Doshi-Rakipi. Viktimat e kësaj masakre elektorale të kryer nga regjimi Rama-Doshi-Rakipi janë qytetarët shqiptarë. Një javë më parë, Partia Demokratike bëri publike një operacion në shkallë të gjerë të blerjes së votës duke përdorur fondet e rindërtimit. Dëmet në banesat individuale ishin rishikuar dhe rritur disafish në mënyrë fiktive për të influencuar votën e familjeve që përfituan.

Individë pa asnjë dëmtim në shtëpitë e tyre u futën në listat e përfituesve përmes një zinxhiri VKM-sh dhe Vendimesh të Këshillave Bashkiakë në 11 bashki. Shifra e përditësuar e transfertave të pakushtëzuara të qeverisë për këto 11 bashki është 124.4 milionë euro të dedikuara vetëm për rindërtimin. Të gjitha këto transferta janë miratuar dhe janë alokuar pas 1 Janarit 2021 duke shkelur Kodin Zgjedhor që e ndalon rreptësisht këtë gjatë 4 muajve të fundit përpara datës së zgjedhjeve”, – tha ajo.

Tabaku u shpreh se këto prova tregojnë se shteti është shkrirë me PS dhe ka deformuar votën e qytetarëve. Deputetja tha se SPAK nuk ka ndërmarrë akoma asnjë hap për të vepruar mbi këtë çështje megjithatë sipas saj beteja do të vazhdojë për t’u kthyer Shqipërinë shqiptarëve.

“Këto janë provat e një prej operacioneve në shkallë më të gjerë të shndërrimit të shtetit në një instrument në dorë të makinerisë së deformimit të votës dhe shkrirjes së shtetit me Partinë Socialiste. Për këtë krim akoma nuk është ndërmarrë një veprim hetimor nga SPAK. Beteja jonë do të zhvillohet në të gjitha frontet, mënyrat dhe mundësitë që ekzistojnë dhe përfundimi i saj do të jetë i qartë: përmbysja e regjimit Rama-Doshi-Rakipi dhe kthimi i Shqipërisë shqiptarëve”, – u shpreh ajo.