Në Kampionatin Ballkanik të Boksit që po zhvillohet në Kroaci, merr pjesë edhe një skuadër me boksierë cilësorë nga Shqipëria. Pas suksesit të korrur të premten, me 4 boksierë nga tanët që arritën në finale, dje ishte radha e Rexhildo Zenelit që korri një sukses të rëndësishëm, duke e kapur edhe ai finalen e madhe në peshën trupore 64 kg. Duhet thënë se Zeneli mundi rivalin e tij maqedonas dhe siguroi një fitore 5-0, fitore bindëse dhe që e konfirmon atë si një prej boksierëve më cilësorë të aktivitetit, pretendent për medaljen e artë.
Dominimi i ndeshjes nga Zeneli tregon dhe një herë se ai ka cilësi dhe bën diferencë, por në të njëjtën kohë ai është pretendent për të kapur normën olimpike, i vetmi nga boksi ynë që mund ta realizojë këtë dhe shansi do t’i jepet këtë muaj në Kampionatin Europian, atë aktivitet që u ndërpre një vit më parë për shkak të pandemisë. Zenelit i duhet një fitore e pastër në atë aktivitet që të sigurojë pjesëmarrjen në Olimpiadë.
Ndërkohë, të dielën në mbrëmje do të luhen disa prej finaleve të Kampionatit Ballkanik të Boksit, ku shpresohet që kuqezinjtë e dorezave të tregohen në lartësinë e duhur dhe të sjellin medalje ari në Shqipëri. Janë 5 boksierë nga Shqipëria që garojnë në finale në kategori të ndryshme peshash dhe ky është një sukses i madh i skuadrës kombëtare të boksit.
Diskutime rreth kësaj post