Ulsi Manja: PS e ka vendosur për të shkarkuar Metën, nëse do gjejmë shkelje penale do t’i kërkojmë SPAK ta hetojë

Socialistët duket të vendosur për të shkarkuar presidentin Ilir Meta nga detyra. Ky i fundit para dhe gjatë fushatës zgjedhore u zhvesh nga kostumit i kreut të shtetit, duke bërë thirrje politike dhe për dhunë. Por për mazhorancën socialistet kjo strategji e ndjekur nga presidenti Meta meriton ndëshkim shembullor. Ka qenë kreu i Komisionit të Ligjeve, njëherësh deputet i Partisë Socialiste, Ulsi Manja, i cili gjatë një prononcimi për mediat ditën e djeshme garantoi se PS do t’i shkojë deri në fund nismës së saj për ta shkarkuar Metën nga detyra.

“Sot Kuvendi i Shqipërisë, formalizoi një procedurë, të cilën kjo mazhorancë e kishte paralajmëruar që gjatë fushatës së zgjedhjeve të 25 prillit. Nëpërmjet Ballës deklaruam që me Presidentin e Republikës, lidhur me këtë sjellje që po manifeston gjatë procesit zgjedhor do të merremi menjëherë pas zgjedhjeve të 25 prillit. Komisioni Hetimor do të duhet t’i referojë Kuvendit një raport të themeluar tërësisht në konsiderata juridike. Pra Komisioni Hetimor në rastin konkret do të duhet të hetojë shkeljet e pretenduara nga pikëpamja juridike dhe ne jemi të vendosur që ta çojmë deri në fund nismën për shkarkimin nga detyra të Metë”, deklaroi ai.

Më tej teksa ka listuar disa nga shkeljet e presidentit Meta siç janë thirrjet për dhunë që sipas tij, janë anti-kushtetuese, deputeti Manja theksoi e nëse gjatë hetimeve që do të kryejë komisioni hetimor do të gjejë edhe shkelje të natyrës penale të konsumuara nga kreu i shtetit, atëherë do të hyjë në lojë SPAK.

“Meta ka shkelur nenin 86 të Kushtetutës që e definon Presidentin kryetar shteti dhe simbol i unitetit të Kombit. Që do të thotë presidenti nuk mund të marrë anë politike. Por në rastin konkret, përpara zgjedhjeve të 25 prillit Presidenti çfarë bëri? Mbivendosi autoritetin kushtetues të Presidentit të Republikës duke mbajtur anë politike, duke u vënë tërësisht në shërbim të një force politike në opozitë. Pra Presidenti doli nga misioni i vet kushtetues duke iu kundërvënë hapur qeverisë. Komisionet Hetimore sigurisht bëjnë një raport për Kuvendin, që në rastin konkret raporti mund t’i propozojë Kuvendit shkarkimin e Presidentit të Republikës. Por, në rast se Komisioni Hetimor konstaton edhe shkelje të natyrës penale që nuk janë në tagrin e Kuvendit, Kuvendi merr vendim për t’ia referuar organeve kompetente, që në rastin konkret është Prokuroria”, nënvizoi kreu i Komisionit të Ligjeve, Ulsi Manja.