Ish-këshilltari i Ilir Metës në kohën kur ai ishte kryetar Kuvendi, Ralf Gjoni, shprehet me bindje të plotë se Monika Kryemadhi duhet të dorëhiqet nga LSI.
I ftuar tek A2CNN, Gjoni theksoi se nisur nga rezultati i zgjedhjeve ku LSI mori vetëm 4 mandate, nëse Kryemadhi nuk largohet atëherë kjo parti do të zhduket.
“Ilir Meta do t’i duhej më tepër tani LSI-së për ta kthyer atë parti në binarë. Për ndryshe, LSI-ja, e cila nuk ka as numrat për të formuar një grup parlamentar, nuk e di se çfarë do të bëjnë ata 4 deputetë. Do të jenë shumë të vetmuar.
Unë mendoj se LSI mund të krijojë një frymë si një forcë opozitare, progresiste, e qendrës. Monika Kryemadhi dorëhiqet. Unë mendoj se Ilir Meta rikthehet në parti si anëtarë, të hapet gara për figura të reja për të riformuar partinë.
Luan Rama, për shembull do të ishte shumë më i aftë se Monika Kryemadhi dhe kjo nuk ka diskutim. Shumë prej nesh do të ishin shumë herë më të aftë se Monika Kryemadhi dhe për këtë mos keni dyshime.
E them me shumë dashamirësi dhe jo me dashuri, nëse Monika Kryemadhi nuk dorëhiqet, LSI mbaron. Unë gjykoj me shumë dhimbje se LSI zhduket, nuk mbijeton dot në skenën politike”, – u shpreh Ralf Gjoni.
Diskutime rreth kësaj post