Ylli Manjani tha në emisionin “Barometri Politik” se rezultati i zgjedhjeve të 25 prillit ka për të qenë i qartë, pra nuk do të ketë një rezultat të ngushtë.
“Në zgjedhjet e 25 prillit, rezultati do të jetë i qartë. Kushdo që e merr, e merr”, u shpreh ish ministri i Drejtësisë.
Manjani tha se ende nuk dihet se kush do e marrë, mirëpo në pushtet do të vijë ose Partia Socialiste ose Koalicioni Opozitar, duke përjashtuar mundësinë e ndarjes së pushtetit apo bashkëpunimin midis dy partive kryesore, gjë që është përfolur gjatë ditëve të fundit.
“Basti është e merr Edi Rama vetëm, ose e merr opozita. Nuk pres variante hibride. Në korridoret politike ditëve të fundit flitet për një ndarje pushteti, unë nuk mendoj se ka për të ndodhur”, tha Manjani.
Manjani theksoi se ose do e marrë pushtetin Edi Rama, ku sipas tij rezultati do të jetë një pushtet autokrat afatgjatë, ose do e marrë opozita shqiptare gjë që sipas tij do të bëjë që politika shqiptare t’i kthehet normalitetit.
“Ose Edi Rama merr vetëm pushtetin dhe e gëzon dhe në 35 vitet e ardhshme do të jetë mbreti i Shqipërisë, ose do ta marrë opozita dhe do të kthehet politika në normalitet. Kjo është sfida e këtyre zgjedhjeve”, tha Ylli Manjani.
Diskutime rreth kësaj post