“Plani i kryeministrit për riorganizimin e kufijve të Ballkanit, Kosova do të bashkohet me Shqipërinë, Bosnje-Hercegovina do të shpërbëhet”, reagon për herë të parë ambasada amerikane për hartën që po trazon ‘ujërat’

Lidhur me lajmin se kryeministri slloven Janez Jansha ka paraqitur një “plan për riorganizimin e kufijve të Ballkanit”, mediat atje kanë kërkuar edhe një koment nga ambasada amerikane në Slloveni.

Sipas mediave atje, ambasada amerikane, në përgjigjen e tyre ka thënë se Shtetet e Bashkuara vlerësojnë shumë partneritetin afatgjatë me BeH dhe se ata mbështesin sovranitetin dhe integritetin e saj territorial, i cili parashikohet në Marrëveshjen e Paqes të Dejtonit.

“Ne mbetemi të përkushtuar ndaj qëllimit të përbashkët të një Bosnje dhe Hercegovine demokratike, gjithëpërfshirëse dhe të prosperuar në rrugën drejt integrimit Euro-Atlantik”, citohet të jetë shkruar në përgjigjen e ambasadës amerikane në Slloveni.

Në përgjigje, ata gjithashtu kanë theksuar se Shtetet e Bashkuara janë një mbështetëse e fortë e të gjitha vendeve të Ballkanit Perëndimor që kërkojnë anëtarësim në organizatat Euro-Atlantike.

“Ne jemi të bindur se e ardhmja e Ballkanit Perëndimor qëndron në BE. Procesi i zgjerimit promovon paqen, stabilitetin dhe prosperitetin afatgjatë në të gjithë rajonin”, është thënë më tej në përgjigjen e ambasadës amerikane në Slloveni.

Ndryshe, një reagim ndaj një “dokumenti të tillë” ka ardhur edhe nga eurodeputetja sllovene, Tanja Fajon. Fajon ka shkruar se pavarësisht nëse është një dokument i krijuar në Slloveni apo jo, dëmi që u krijua për këtë vend është tashmë shumë i madh. Siç ka thënë më tej Fajon, mënyra e vetme për paqe, bashkëpunim dhe bashkëjetesë të vendeve dhe kombeve në Ballkanin Perëndimor është perspektiva e tyre e qartë evropiane.