Ish-kryeministri Sali Berisha ka dalë kundër zërave se Partia Demokratike dhe Partia Socialiste do të shkojnë drejt një bashkëqeverisjen me njëra-tjetrën pas zgjedhjeve parlamentare të 25 prillit për të mirën e integrimit të Shqipërisë në Bashkimin Europian.
Teksa ishte i ftuar në një studio televizive mbrëmjen e djeshme, ish-kryeministri u pyet se sa janë mundësitë që PD dhe PS të jenë në një koalicion, duke qeverisur së bashku. Por zoti Berisha u shpreh kategorikisht kundër një skenari të kësaj natyre, ndërsa i dërgoi edhe një mesazh kryetarit të Partisë Demokratike, Lulzim Basha që të refuzojë bashkëqeverisjen me kreun e Partisë Socialiste, Edi Rama.
“Mandatimi i një shumice të re të udhëhequr nga gjeneratë ë re është garanci për ecjen e integrimit dhe një klimë të mirë politike në vend. Por unë nuk besoj tek bashkëqeverisje PD-PS, pasi për mua koalicioni mbi partiak është fatkeqësi kombëtare. Vendi duhet të ketë opozitë të fortë nga njëra anë dhe qeveri të fortë nga ana tjetër”, – deklaroi ai.
Më tej i pyetur se përse nuk është shumë aktive në fushatën elektorale dhe se mungesa e tij është diktuar nga kompania izraelitet që menaxhon fushatën elektorale të Partisë Demokratike, që të mos dalë shpesh pasi i prish punë PD-së, ish-kryeministri Sali Berisha e pranoi një gjë të tillë. Prerë dhe qartë, zoti Berisha theksoi se ai është izoluar, pasi e ka edhe vetë si mision.
“Jam vetë në atë linjë që të mos jem shumë aktiv në fushatë elektorale. PD ka një lider, opozita ka një lider dhe ky është Lulzim Basha. Në vlerësimin tim, po bën një fushatë dinjitoze, ndër më të mirat dhe interesi im absolut dhe i çdo demokrati është suksesi i udhëheqësit politik të fushatës. Unë jam Sali Berisha pa asnjë rol në udhëheqjen e PD. Kemi marrëdhënie shumë të mira me kryetarin dhe të gjithë drejtuesit e partisë, por pa asnjë ndërhyrje tjetër. Unë nuk marr më shumë vota. Më shumë vota do të marrë kryetari i PD. Lulzim Basha është fitimtari i këtyre zgjedhjeve dhe ju duhet të gëzoheni”, – u shpreh ai.
Nga ana tjetër, ish-kryeministri Sali Berisha i doli në mbrojtje presidentit Ilir Meta, ndonëse ky i fundit sulmohet shpesh nga qeveria për faktorizimin në prag të zgjedhjeve. Për Berishën, Meta thjesht po bën detyrën e tij për të garantuar një proces zgjedhor normal.
“Meta kërkon të mbrojë kushtetutshmërinë e zgjedhjeve. Opozita do të fitojë zgjedhjet dhe çdolloj presupozimi se kjo mazhorancë mund të konfirmohet, është i pamundur. Presidenti si avokat i Kushtetutës po bën gjithçka për t’i treguar qeverisë se ka kufij ligjorë, shkelja e të cilave shoqërohet me pasoja”, – nënvizoi Berisha.
Diskutime rreth kësaj post