Berisha tregon lidhjet familjare të Fatmir Xhafajt tek punëtorët në Albcontrol

65 kontrollorë të trafikut ajror kanë ndaluar punën ditën e djeshme duke kërkuar plotësimin e disa kërkesave si: rikthim i kolegëve në punë; shfuqizim i vendimeve të bordit; rikthimi i pagës së plotë sipas kontratës kolektive; transparencë financiare e plotë për vitin 2020; një anëtar sindikate të jetë anëtar bordi.

Ish-kryeministri, Sali Berisha, thotë se qeveria Rama veproi si një regjim diktatorial me kontrollorët e Rinasit. Për Rtv Ora, ai thotë se në çdo vend të botës ka greva të herëpashershme të kontrollorëve të trafikut ajror, por askush nuk i trajton si puçistë siç bëri Rama.

Deklarata e Berishës:

“Qeveria shqiptare veproi si çdo lloj regjimi diktatorial duke filluar nga akuzat për grusht shteti në një kohë kur aty janë njerëzit e tyre më të besuar. Në funksionet më të rëndësishme të kontrollit ajror është vëllai nga nëna i Fatmir Xhafaj, në pozicionin tjetër po kaq të rëndësishëm është benjamini kryesor i ndrikull grykësisë e me radhë. U përdorën formulat më të vjetra për të zgjidhur një problem delikat sepse pozicioni i Albcontrol është një nga më delikatët për vendin. Por kontrollorët e hapësirës ajrore në mbarë botën, përfshirë SHBA, Italinë, Gjermaninë dhe vende të tjera herë pas here ngrejnë zërin e tyre qoftë dhe me greva për kërkesa të caktuara. Veprimtaria legale e kontrollorëve mori një përgjigje ilegale, antikushtetuese, manumilitar. Kjo nuk është zgjidhja sepse zgjidhja është duke njohur, respektuar kërkesat e drejta, duke vazhduar dialogun me punonjësit e një sipërmarrje publike.

Me datën 20 e ca janar kontrollorët e trafikut ajror të Italisë kanë qenë në grevë, në SHBA kanë bërë një seri grevash dhe akush nuk i ka akuzuar ata për puçe, sabotim dhe grushte shteti. Akuza të kësaj natyre janë akuza të regjimeve të shkuara, reminishenca e atyre regjimeve. Gjithçka duhej të zgjidhej me dialog, nëse kishte një emergjencë duhej ti jepej rrugë. Por nuk mund të trajtoheshin kurrë si puçistë pse është i vëllai i Fatmir Xhafaj apo benjami i ndrikull Ballukut”, u shpreh Sali Berisha.