Pas vendimit të fundit që mori Kolegji Zgjedhor, reagon e revoltuar ‘flakë për flakë’ PD-ja: Kjo është e ndikuar nga PS-ja

Pas vendimit të Kolegjit Zgjedhor për listat e Partisë Demokratike, vjen reagimi i menjëhershëm nga PD-ja. Sipas Ivi Kasos, sekretarit të Çështjeve Zgjedhore në PD, ky vendim është i ndikuar nga PS. Në një deklaratë publike, ai thekson se vendimi nuk respekton ligjin elektoral.

Deklaratë e Sekretarit për Çështjet Zgjedhore Ivi Kaso:

“Vendimi i sotëm i Kolegjit Zgjedhor për listën e deputetëve nuk është vendim që respekton ligjin elektoral. Ndalimi i opozitës për t’u përfaqësuar në zgjedhje me lista të plota është i ndikuar politikisht nga interesi politik i partisë në pushtet.

Jemi të keqardhur për këtë vendim që nuk i shërben ligjit dhe interesit publik, por ne besojmë se rezultati në fund të procesit zgjedhor do të tregojë se opozita është shumica politike në vend.

Pavarësisht se vendimi i Kolegjit nuk është në përputhje me ligjin, ne do ta respektojmë atë dhe do të vazhdojmë betejën tonë për fitoren e zgjedhjeve në 25 Prill, për t’u sjellë shqiptarëve ndryshmin që duan dhe meritojnë.” – tha Kaso.