Mazhoranca ka rrëzuar dekretin e presidentit Ilir Meta për karrierën ushtarake. Në seancën e djeshme plenare, Kuvendi ka rrëzuar një tjetër dekret të presidentit Ilir Meta, të cilin ky i fundit e kishte kthyer në Parlament për rishqyrtim. Dekreti i Presidentit u rrëzua me 83 vota kundër, ndërsa 10 deputetë abstenuan.
Sipas presidentit Meta, ky ligji dekurajon arsimimin e të rinjve dhe nxit idenë e gabuar se gjen punë edhe pa shkollë. Po ashtu presidenti arsyeton në momentin e kthimit të ligjit se cenohet meritokracia në Forcat e Armatosura, ndërsa bën thirrje që të përmirësohet trajtimi financiar i ushtarakëve për të ndaluar largimin e tyre nga vendi. Në fjalën e tij në Kuvend, ministri i Mbrojtjes, Niko Peleshi hodhi poshtë pretendimet e presidentit Meta se ky ligj nuk është konsultuar as me presidentin dhe as me ushtarakët.
Peleshi u shpreh se konsultimet për këtë ligj kanë nisur që gati dy vite më parë. Ai theksoi po ashtu se janë marrë parasysh edhe sugjerime nga ana e amerikanëve lidhur me ndryshimet në këtë ligj.
“Për rikthimin e ligjit nga presidenti për rishqyrtim në Kuvend mund të them se këto pretendime nuk janë aspak të vërteta. Konsultimet për këtë ligj kanë nisur që në mars të vitit 2019. Po ashtu janë marrë në konsideratë edhe sugjerime nga amerikanët”, – tha Peleshi.
Teksa foli për risitë që sjell ligji për karrierën ushtarake në Forcat e Armatosura ai u shpreh se përfshihet garantimi i rekrutimeve të sigurta si për trupën e ushtarëve ashtu edhe për oficerët, po ashtu edhe trajtim financiar për ushtarakët sipas gradës. Ai bëri me dije se ndryshimet në ligj bëjnë të mundur edhe mbështetjen e personelit me specialitete të veçanta.
“Risitë që sjell ndryshimi i këtij ligji janë, garantimi i rekrutimeve të sigurta si për trupën e ushtarëve ashtu edhe për oficerët. Trajtimin dinjitoz të studentëve ushtarakë që zgjedhin për të studiuar dhe më pas për të shërbyer në FA. Rritjen e konkurrencës për të përzgjedhur më të mirët për nën/oficerë aktivë nga personeli i ushtarëve në FA. Kushtet e kritere të njëjta për të gjithë personelin ushtarak nën/oficer dhe oficer në FA. Garantimi i përfitimit të trajtimit sipas statusit të ushtarakut edhe për gradat e ulëta”, – tha ai.
Ligje të tjera që u miratuan
Edhe pse Parlamenti rrëzoi dekretin e presidentit për karrierën ushtarake një sërë projektligjesh të tjera u miratuan në seancën e djeshme plenare. Dy nga projektligjet që morën votat maksimale nga deputetët për miratim ishin ligji për Gardën e Republikës dhe për sigurinë e automjeteve. Projektligji “Për sigurimin e detyrueshëm në sektorin e transportit”, i cili synonte përmirësimin e bazës ligjore në tregun e sigurimit të detyrueshëm, për të reflektuar ndryshimet e pësuara nga tregu i sigurimeve me qëllim mbrojtjen e konsumatorit dhe përafrimit me standardet ndërkombëtare. Ky ligj u miratua me 85 vota pro, 6 kundër dhe 5 abstenim. Projektligji tjetër, “Për Gardën e Republikës së Shqipërisë”, përmes të cilit reformohet Garda e Republikës, riorganizohet në tërësi si shërbim përmes ndjekjes së modeleve të ngjashme të homologëve dhe përafrohet statusi i punonjësit të këtij shërbimi me atë të punonjësit të Policisë së Shtetit, pas diskutimeve parlamentare u miratua me 90 vota pro, 3 kundër dhe 4 abstenim. Po ashtu projektligje të tjera që u miratuan ishte edhe projektligji për disa shtesa dhe ndryshime në ligjin nr. 115/2017 “Për krijimin e Agjencisë Kombëtare të Diasporës”, që plotëson mungesën e hapësirës ligjore që nuk rregullohen nga Ligji për Prokurimin Publik, duke ia lehtësuar veprimtarinë dhe proceset e punës kësaj agjencie, u miratua me 88 vota pro, 5 kundër dhe 5 abstenim.
Diskutime rreth kësaj post