Partia Demokratike ka shtuar dozën e sulmeve ndaj qeverisë. Basha dhe drejtuesit e tij në qarqe janë fokusuar tek dështimet e qeverisë me premtimet e bëra nga kryeministri Edi Rama në vitin 2013 dhe 2017.
Kreu i PD tha se Rama në këto 8 vite qeverisje nuk ka mbajtur asnjë nga premtimet e bëra. Basha u shpreh se kryeministri nuk e bëri shëndetësinë falas, nuk hapi as 300 000 vende pune e madje nuk u realizua as futja e Shqipërisë në Bashkimin Europian. Sipas tij, në 25 prill Rama do të humbasë e do të vijë një qeveri e cila do të punojë për qytetarët.
“Rama në vitin 2013: Ju premtoj shëndetësi falas për të gjithë, 300 000 vende pune, kosto më të ulëta jetese dhe futjen e Shqipërisë në BE. Rama dje, pasi nuk ka përmbushur as edhe një prej premtimeve të tij për 8 vjet: Dua të zgjidhem sërish që të mbaj premtimet. Më 25 prill: Rama humb, fiton Shqipëria dhe qeveria, më në fund, fillon të punojë për qytetarët”, – u shpreh Basha.
Reagojnë koordinatorët
Edhe drejtuesi politik për qarkun e Elbasanit, Gazment Bardhi, vizitoi banorët e këtij qarku ku u shpreh se qeveria ka dështuar duke dhënë vetëm premtime boshe. Sipas tij nuk ka as shëndetësi falas, as vende të reja pune apo ulje të kostos së jetesës siç kryeministri premtoi. Bardhi e akuzoi qeverinë për mosjustifikim të pasurive të deklaruara dhe vjedhje të buxhetit. Ai tha se ndryshimi duhet bërë patjetër në 25 prill që me Bashën kryeministër, vendi të ecë para.
“Këta pasuruan vetëm veten dhe varfëruan popullin. Çmimet u rritën të gjitha, pensionet në vendnumëro, siç ka ngecur dhe Shqipëria në vendnumëro. Nga qarku i Elbasanit kanë ikur 75 mijë qytetarë në këta 8 vjet, rreth 25% e popullsisë. Nuk është bërë asnjë hap përpara. Edi Rama bërtet për shëndetësi falas, por shëndetësi falas nuk ka. 300 mijë vende pune jo, ulje e kostos së jetesës jo, përkundrazi, na e rriti, prandaj na duhet ndryshimi. Jo më me premtime boshe. E vetmja punë që kjo qeveri ka bërë është vjedhja e lekëve të buxhetit dhe pasurimi për vete. Nuk justifikojnë as pasurinë e deklaruar, ndërsa shqiptarët marrin rrugët. Këtë do ta ndryshojmë më 25 prill. Vendit i duhet një kryeministër si Lulzim Basha për ta çuar përpara”, – tha Bardhi.
Gjithashtu dhe kryetari i Forumit Rinor të Partisë Demokratike, Belind Këlliçi, e akuzoi qeverinë për projekte abuzive dhe dhunë sistematike ndaj shumë qytetarëve. Këlliçi solli shembullin e projektit të Unazës së Re ku u shpreh se qeveria ka bërë një diferencim ndasor me legalizimet e shtëpive dhe shumë prej banorëve janë marrë me dhunë duke i mbajtur në rajone policie, e cila është e paligjshme. Kreu i FRPD u shpreh se banorët kërkojnë një qeveri, e cila do të mbrojë interesat e tyre jo t’i dhunojë ata. Sipas Këlliçit, qeveria me në krye Lulzim Bashën do të bëjë të mundur fitoren e Shqipërisë dhe shpërblimin e çdo sakrifice nga qytetarët.
“Projekti i Unazës së Re është një projekt abuziv. Diferencimi ndasor me legalizimet e shtëpive dhe dhuna sistematike gjatë 400 ditëve protesta të banorëve, kanë shënuar kulmin e urrejtjes ndaj modelit Rama. Marrja me dhunë e banorëve dhe mbajtja e tyre në rajonet e policisë ka qenë e paligjshme! Ka patur raste kur vetë ministra të qeverisë Rama, kanë kërkuar në ditë të caktuara, që disa familje të merreshin me forcë në komisariate. Banorët kërkojnë një qeveri që mbron interesat e tyre. Një qeveri për të gjithë shqiptarët! Qeveria Basha, pas 25 prillit, do të dëmshpërblejë banorët për shtëpitë që kanë ngritur me kursimet e një jete. Sakrifica sublime e banorëve protestues të Unazës së Re, nuk do të harrohet. Më 25 prill, Shqipëria fiton”, – tha Këlliçi.
Diskutime rreth kësaj post