Ende pa një marrëveshje, Mediu i bën kërkesën publike Lulzim Bashës: Kjo është shumë e rëndësishme

Kreu i Partisë Republikane, Fatmir Mediu në një takim me anëtaret e Kryesisë së Grave të PR u ndal tek marrëdhënia e PR-së më PD, që ende nuk kanë arritur një marrëveshje për të dalë në një koalicion në zgjedhjet e 25 prillit.

Kryerepublikani vlerësoi programin që PD ka prezantuar deri më tani por kërkoi prej Bashës integrim me platformat e partive të tjera opozitare.

“Që ky program që është paraqitur nga Partia Demokratike, duhet patjetër të integrohet me programet e partive të tjera të opozitës, për të krijuar programin e qeverisjes së qytetarëve shqiptarë, në interes të Shqipërisë, në shërbim të interesave tona kombëtare” – tha ai.

Më e rëndësishme sipas tij është dhe afrimi i njerëzve të kualifikuar që mund të jenë nesër në qeverisje, dhe jo thjeshtë që i përkasin politikës opozitare.

“Është e rëndësishme që ky program po ashtu të shoqërohet me njerëz kualitativë, të cilët do të jenë pjesë e qeverisjes së nesërme dhe jo vetëm thjesht njerëz të politikës opozitare” – tha Mediu.

Afrimi i njerëzve të kualifikuar është edhe më e rëndësishme sipas Mediut, në kushtet kur sipas tij vendi ndodhet në një krizë të rëndë politike, institucionale dhe ekonomike.