“Kupa është mbushur”, me tone të revoltuara Basha del me reagimin e fortë: Rama mund të ofrojë vetëm dështime të tjera më të mëdha

Pas konferencës që mbajti sot kryeministri Rama me gazetarët mbi bilancet e vitit që po lëmë pas, ka ardhur reagimi i fortë i kryedemokratit Lulzim Basha.

Me tone të ashpra, Basha shkruan se kupa është mbushur pasi Rama vetëm gënjen dhe vendi ka nevojë për ndryshim.

“Edhe në fundit të vitit, Rama bëri atë që di të bëjë: gënjeu. Ai i ka dhënë Shqipërisë vetëm premtime boshe.

Ai gënjen kur flet për ndihmë ekonomike. Fakti është se Shqipëria është vendi që jep ndihmën më të vogël ekonomike për qytetarët e saj.

Kosto e jetesës rritet dita ditës, papunësia shtohet përditë, bizneset dhe dyqanet mbyllen dhe familjet shqiptare nuk marrin ndihmë nga qeveria. Por këto fakte nuk e pengojnë Ramën të gënjejë dhe të thote se “çdo gjë është në rregull”.

Kur i mohon problemet ku je zhytur, si mund t’i zgjidhësh ato?

Kupa është mbushur! Pas 7 vitesh dështime, Rama mund të ofrojë vetëm dështime të tjera më të mëdha. Shqipëria ka nevojë për ndryshim. Shqipëria ka nevojë për shpresë të re. Shqipëria ka nevojë për një qeveri që kujdeset për popullin, jo një qeveri që kujdeset për veten. Ky vit i keq do të kalojë dhe ne sëbashku do t’i kthejmë shpresën Shqipërisë.”, shkruan Basha.