A ka një lider të preferuar në Shqipëri? Vjosa Osmani flet hapur dhe tregon pengun e saj gjatë vizitës në Tiranë

Presidentja në detyrë e Kosovës, Vjosa Osmani shprehet se i ka mbetur një peng gjatë vizitës së saj në Tiranë.

“Po për shkak të pandemisë ishte e pamundur që ta organizonim si do të donim. Dëshira ime e madhe është të takoj përveç liderëve edhe grupe të tjera që përfaqësojnë, artin, kulturën, studentët, por për shkak të pandemisë janë rrethana të tjera, që nuk na lejojnë ta plotësojmë. Për të dëgjuar nga grupet e interesit, jo vetëm nga politika. Shpresoj që shumë shpejt do ta bëjmë edhe këtë pjesë”, u shpreh Vjosa Osmani për ABC.

Por a ka ajo një preferencë për liderët në Tiranë?

“Për mua trajtimi është i njëjtë, preferenca kam për popullin shqiptar. Lidhja ime është për qytetarët. Liderët ndryshojnë, sot është dikush nesër dikush tjetër. Është dëshirë e jona që të bashkëpunojmë me gjithsecilin, pasi nuk do të falej nëse liderët nuk do të hapnin rrugë bashkëpunimi. Unë bashkëpunoj me të gjithë, nuancat çfarë qëndrimi kanë ata janë çështje tjetër. Unë nuk isha në cilësi personale, por institucionale, prandaj detyra ime është ti takoj me të gjithë”, tha Osmani.