Presidenti Meta dekretoi ministrat e rinj, Taulant Balla bën kërkesën e papritur në Kuvend

Presidenti Ilir Meta dekretoi sot emërimin e Bledi Çuçit si ministër i Brendshëm, si dhe të Milva Ekonomi si ministre e Bujqësisë. Menjëherë pas kësaj lëvizjeje të Presidentit Meta, kreu i grupit parlamentar të PS, Taulant Balla kërkoi ndryshimin e rendit të ditës në Kuvend.

Balla kërkoi që të miratohen sa më shpejt ministrat e dekretuar nga presidenti.

“Zoti kryetari i Kuvendit kërkoj përfshirjen në votim të katër dekreteve të presidentit për emërim dhe shkarkim ministrash. Këtë e kërkoj, bazuar edhe te Rregullorja e Kuvendit, por kam biseduar edhe me tre krerët e grupeve parlamentare dhe kemi rënë dakord”, theksoi Balla.

Pas kësaj kërkese, Ruçi e ka pranuar dhe i ka kërkuar administratës së Kuvendit që të përfshijë në rendin e ditës, duke përpiluar dhe fletën e votimit.