Liga e Kampioneve uli mbrëmë tiparin e ndeshjeve në grupe, ku u përcaktuan edhe 16 skuadrat që do të vijojnë më tej. Zhgënjim total për Interin që nuk arriti ta fitojë duelin me Shakhtar Donjetskun ukrainas (0-0) dhe e mbyll në vend të fundit grupin B, duke dalë jashtë Europës.
Në fakt, në grupin B luhej mbrëmë për jetë a vdekje, pasi Reali i Madridit dhe Interi rrezikonin të eliminoheshin. Madrilenët e kishin vuajtur shumë presionin, por një skuadër e madhe di të fitojë në momentin e duhur dhe ishte një veteran si Karim Benzema që ia doli të shënojë në pjesën e parë dy gola përballë Borusias së Munshengladbahut, duke e vendosur fitoren në “shinat” e duhura dhe duke i dhënë Realit të drejtën të kalojë në raundin tjetër.
Interi vuajti gjatë gjithë kohës. Ukrainasit u rreshtuan mirë në prapavijë dhe nuk lejuan hapësira. Edhe pse dominuan italianët, atyre u mungoi finalizimi dhe saktësia në pasimin e fundit. Për pasojë Interi mbetet jashtë Europës. ndeshja u mbyll 0-0. Në grupin A vendi i parë nuk kishte dilema, pasi Bajerni e kishte siguruar atë. Gjermanët u përballën mbrëmë me Lokomotivën e Moskës, duke fituar 2-0. Kurse Atletiko vuajti në transfertë përballë Salzburgut, por një gol i shënuar në pjesën e parë nga Hermoso e në fund të pjesës së dytë nga Karrasko, e çuan skuadrën e Simeones në raundin tjetër. Salzburgu si vend i tretë do të luajë në Europa League.
Në grupin C, Mançester Siti dhe Porto e kishin siguruar që më parë kualifikimin në turin tjetër të Champions, kështu që ndeshjet e djeshme për ta ishin thjesht për statistikë. Mançester Siti shënoi në pjesën e dytë 3 gola, duke e fituar ndeshjen, kurse Porto fitoi përballë Olimpiakosit 2-0. Si vend i tretë shkon në Europa League Olimpiakosi grek. Atalanta e Berat Gjimshitit shkëlqeu dhe një herë tjetër mbrëmë në Champions League, duke fituar në momentin e duhur përballë Ajaksit, në një duel direkt për vendin e dytë në grupin D.
Në këtë grup Liverpuli e kishte siguruar vendin e parë dhe luante i qetë me Midjaellandin danez, një ndeshje që përfundoi në barazim 1-1. Ndërkohë, Atalanta fitoi brenda në Amsterdam me rezultatin 1-0, një fitore e mundimshme, por plot domethënie për Atalantën, që për të dytin vit radhazi kalon fazën e grupeve dhe shfaqet si një skuadër cilësisht spektakolare në Champions. Kurse Ajaksi, si vend i tretë në grup, do të luajë në Ligën e Europës.
Diskutime rreth kësaj post