Ndërkohë që e gjithë bota pret kalimin e pushtetit në vendin më të fuqishëm në botë, nga republikanët me presidentin aktual Donald Trump për tek demokratët me presidentin e zgjedhur Joe Biden, Trump jep sinjale se beteja ligjore për të mos pranuar humbjen në zgjedhjet presidenciale të 3 nëntorit, nuk ka marrë ende fund.
Avokatët e fushatës zgjedhore të Trump sinjalizuan synimin për të vazhduar me padi ligjore deri në janar edhe pse të gjitha shtetet, përveç njërit, kanë certifikuar rezultatin e zgjedhjeve. Nëse të gjithë elektorët (përfaqësuesit e shteteve) do t’i japin votat elektorale ashtu siç edhe populli ka votuar, Joe Biden është presidenti i radhës.
Procedura e radhës për ardhjen në pushtet të Biden
Sipas VOA, ligji amerikan përcakton që të 50 shtetet individualisht certifikojnë rezultatet gjashtë ditë përpara votimit të Kolegjit Zgjedhor më 14 dhjetor, i cili zyrtarizon fituesin e zgjedhjeve presidenciale në SHBA. Vetëm shteti i Uiskonsinit nuk e përmbushi këtë afat për të certifikuar rezultatin deri më 8 dhjetor, por mund ta bëjë këtë deri në fund të javës.
Tetë dhjetori është po ashtu data, kur të gjitha sfidat që lidhen me zgjedhjet në nivel shtetëror, të tilla si rishikimi apo rinumërimi i votave, supozohet të kenë përfunduar. Zoti Biden pritet të fitojë 306 vota të Kolegjit Zgjedhor. Më pas më 6 janar Kongresi do të rishikojë dhe certifikojë rezultatin e Kolegjit Zgjedhor, dy javë para inaugurimit të demokratit Biden si presidenti i 46-të i vendit.
Pretendimi i Trump
Avokatët e fushatës së zotit Trump, Rudy Giuliani dhe Jenna Ellis, përmes një deklarate u shprehën se pavarësisht legjislacionit amerikan, nuk do të ishte herë e parë, pasi ekzistojnë edhe precedentë të mëparshëm që garat zgjedhore të zgjasin përtej 8 dhjetorit. Më tej ata shtuan se pavarësisht mediave që përpiqen të deklarojnë me dëshpërim se beteja mes zotit Trump dhe zotit Biden ka përfunduar, ata do të vazhdojmë të mbrojmë integritetin e zgjedhjeve derisa çdo votë ligjore të llogaritet në mënyrë të drejtë e të saktë.
Ndërkohë që pavarësisht pretendimeve të ekipit të presidentit Trump, Gjykata e Lartë e Shteteve të Bashkuara ka hedhur poshtë të martën kërkesën e republikanëve që kërkonin përjashtimin e rreth 2.5 milion fletëve votimi me postë në Pensilvani. Përmes një njoftimi të shkurtër Gjykata e Lartë hodhi poshtë një kërkesë nga Kongresmeni Mike Kelly, një aleat i zotit Trump, dhe republikanë të tjerë nga Pensilvania, të cilët hapën një çështje gjyqësore pas zgjedhjeve të 3 nëntorit me argumentet se zgjerimi i votimeve me postë në atë shtet ishte i paligjshëm në bazë të ligjit të atij shteti.
Pensilvania ishte një nga shtetet e rëndësishme në zgjedhjet presidenciale, ndërsa demokrati Biden mundi republikanin Trump, i cili e kishte fituar këtë shtet në zgjedhjet presidenciale të vitit 2016. Zyrtarët e shtetit e kishin certifikuar tashmë rezultatin e zgjedhjeve. Sakaq, demokratët dhe kritikë të tjerë e kanë akuzuar Presidentin Trump se po synon të zvogëlojë besimin e publikut në integritetin e zgjedhjeve amerikane dhe të minojë demokracinë duke u përpjekur të përmbysë vullnetin e votuesve. “Zgjedhjet kanë mbaruar. Duhet ta ndalojmë këtë cirk procesesh gjyqësore dhe të ecim përpara”, tha Prokurori i Përgjithshëm i Pensilvanisë Josh Shapiro, një demokrat, përmes një postimi në Twitter.
Diskutime rreth kësaj post