Sulmin e kryeministrit Rama ndaj kreut të PD-së, Lulzim Basha, duke e akuzuar se është përfshirë në hetimet e EULEX, analisti nga Kosova Veton Surroi e shikon si një situatë delikate.
Në një intervistë për RTV Ora, Surroi nënvizon se kemi të bëjmë me një situatë delikate që nuk mund të shfrytëzohet për luftën e brendshme politike.
“Nuk i bën mirë Shqipërisë dhe as ambientit politik dhe as shqiptarëve në Shqipëri që kjo çështje të shfrytëzohet për luftën e brendshme politike. Fillimisht duhet të largohemi nga ky etiketim i njerëzve sepse kemi të bëjmë me një situatë delikate, në të cilën a ka qenë kush i përfshirë si hulumtues apo përkthyes etj, nuk mund ti vihet gishti pasi vihemi në të njëjtën situatë që ka hyrë Serbia. Ish ministri i jashtëm Daçiç i cili para disa muajsh akuzonte serbët se kanë folur kundër kryerjes së krimeve në Serbi dhe kanë treguar varrezat masive. Kosova për fat të mirë nuk e ka këtë dimension të krimit të organizuar çfarë ka pasur Serbia me varrezat masive, por nuk mund të hyjmë në të njëjtin diskurs të trajtimit të një çështje kaq delikate sa balllafaqimi me të kaluarën’, tha analisti.
Sipas Surroit, ballafaqimi me të kaluarën do të zbulojë dhe moment të pakëndshme, por pas 20 vitesh këto duhet të shërbejnë më shumë si mësime historike sesa konfrontime.
‘Ne po hyjmë në një fazë të ballafaqimit me të kaluarën ku do të dalin dhe gjëra krejtësisht të pakëndshme. Do të dalë momenti i konflikteve politike por dhe të armatosura për primat politik. Por këto duhet ti marrim si pjesë të historisë. Kemi një distancë të mjaftueshme prej 20 vitesh dhe duhet të jenë mësime historike sesa konfrontime të brendshme politike’, ka përfunduar Surroi.
Diskutime rreth kësaj post