Kreu i PR, Fatmir Mediu është ndalur ditën e djeshme në qytetin e Kukësit, ku ka mbledhur strukturat e Partisë Republikane në Dibër, ndërsa ka shpërthyer në akuza të forta në adresë të kryeministrit Edi Rama.
Gjatë fjalës së tij, kryerepublikani Mediu deklaroi se Rama është i vendosur për të manipuluar zgjedhjet e 25 prillit, ndaj ai kërkoi nga opozita të ngrihet në nivelin e përgjegjësisë kombëtare për të garantuar zgjedhje të lira.
“Rama është i vendosur për të manipuluar zgjedhjet, prandaj opozita duhet të ngrihet në nivelin e përgjegjësisë kombëtare, për të garantuar liritë dhe të drejtat e shqiptarëve, të drejtën për zgjedhje të lira dhe të ndershme. Refuzimi që Rama i bën Bashkimit Europian është refuzimi që i bën qëllimeve tona si shtet dhe komb, për të ruajtur me çdo kusht regjimin e tij të korruptuar. Ne kemi mundësinë dhe duhet të bashkojmë shqiptarët kundër këtij regjimi, por mbi të gjitha të bashkohemi për ta bërë Shqipërinë Europiane, brenda mandatit të parë qeverisës”, deklaroi ai.
Më tej Mediu akuzoi kryeministrin Rama për një politikë përçarëse ndaj shqiptarëve në Kosovë. “Një komb, një qëndrim, ka qenë moto e gjithë politikave dhe politikanëve shqiptarë, ndërsa sa ka ardhur në pushtet Rama, paternalizmi i tij ndaj Kosovës, “miqësia” me Vuçiç dhe Serbinë, e cila nuk ka reshtur për të rikthyer hegjemoninë në Ballkan, ka sjellë një çorientim total në politikat tona rajonale dhe marrëdhëniet me partnerët, përçarje dhe shpërfillje të faktorit politik shqiptar”, u shpreh ai.
Ndërkohë zoti Mediu u ndal edhe në situatën që pandemia ka krijuar në vendin tonë. Ai tha se Covid-19 po krijon drama të rënda në shumë familje, ndërsa akuzoi Ramën se ka futur në kolaps ekonominë. “Kukësi dhe mbarë Shqipëria është zhytur në varfëri, korrupsion dhe pasiguri. Ekonomia është në kolaps, taksat e larta dhe korrupsioni po shkatërrojnë mundësinë për të bërë biznes. Papunësia është prezente në familjet shqiptare. Pandemia e COVID po krijon drama të rënda në shumë familje, por mosmbështetja nga qeveria dhe shkatërrimi i bizneseve po kthehet në dramë kombëtare. Sistemi shëndetësor dhe ai arsimor janë në gjendje të mjerueshme, për shkak të regjimit të korruptuar të Ramës”, nënvizoi kreu i PR, Fatmir Mediu.
Diskutime rreth kësaj post