Përmes një video-mesazhi kryetari i PD-së, Lulzim Basha i ka kërkuar kryeministrit Edi Rama të heqë dorë nga akuzat për shpifje dhe mashtrime në adresë të tij dhe të fokusohet tek pandemia.
Sipas tij, Rama sulmon opozitën për të larguar vëmendjen nga dështimet e skandalet e qeverisë së tij.
Basha i bëri thirrje kryeministrit të zbatojë planin e PD për të luftuar pandeminë. Gjithashu u shpreh i bindur se do ta mposhtë Ramën në zgjedhje dhe se do të përmbushë të gjitha premtimet e pambajtura, siç i cilësoi ai.
“Rama, duhet të të vijë turp nga vetja.
Në vend që të luftosh kovidin, në vend që të marrësh masa për të shpëtuar ekonominë, në vend që të ndihmosh qytetarët – ti po përhap gënjeshtra monstruoze kundër meje.
Harxhon gjithë kohën për të përhapur gënjeshtra në vend që të shpëtosh jetën e qytetarëve shqiptarë dhe ekonominë tonë.
Si nuk ke turp? Edhe për nivelin tënd të ulët, kjo është e papranueshme.
Si të gjithë qytetarët shqiptarë, unë jam mësuar të dëgjoj gënjeshtra nga ti. Sepse ti nuk je ne gjendje të mbash asnjë premtim të vetëm. E vetmja gjë që bën është shkatërrimi i ekonomisë dhe i të ardhmes tonë.
Ndërkohë që merresh me vizatime dhe nuk shkulesh nga Instagrami, unë e kam vënë tërë jetën time në shërbim të vendit. Për Shqipërinë. Për shqiptarët. Për pavarësinë e Kosovës.
Ti nuk më bën dot moral mua për patriotizëm.
Ti nuk më mëson dot mua çfarë është besnikëria ndaj Shqipërisë.
Edhe sot me gënjeshtrat, mashtrimet dhe veprimet e tua ti dëmton Shqipërinë, Kosovën dhe interesat kombëtare.
Po ta them qartë dhe prerë, të gjitha akuzat e tua janë shpifje dhe mashtrime për të larguar vëmendjen nga skandalet dhe dështimet e tua që po i paguajmë me jetë njerëzish.
Për të gjitha këto po vjen dita të japësh llogari para drejtësisë”, shprehet Basha.
Diskutime rreth kësaj post