Gazetarja dhe moderatorja Aida Shtino ka folur për “Njerëz të Humbur” duke treguar se i mungon shumë dhe ajo kohe, pasi aq shumë përfshihej në ngjarje sa shihte në ëndërr sikur gjente njerëz.
“Më mungojnë dhe është një pjesë e jetës time që nuk do ta harroj kurrë dhe i përket asaj pjese të profesionit tim ku kam dhënë shpirtin dhe gjithë pasionin tim për punën dhe e kam bërë me dëshirë. Ka shumë dosje që janë të pagjetura dhe nëse do më jepet mundësia, pse jo, mund të bëja paralelisht të dyja emisionet. Sa më shumë të kërkohet rreth një qenie njerëzore dhe të gjendet se ku ndodhet, aq më mirë është.
Kur kam pasur emisionin, shikoja gjithë kohës ëndrra sikur i gjeja, sikur i kërkoja. Besoj se do të vijë një kohë që do ti shkruaj të gjitha ato përjetime, kam filluar, jam në përfundime të disa librave”, u shpreh Shtino.
Ndërsa thekson se i kanë mbetur peng dosjet e fëmijëve të humbur, një pjesë e madhe e të cilëve nuk janë zbuluar ende dhe në ditët e sotme.
“Kam qarë, pothuajse për çdo emision kam qarë pavarësisht se publiku nuk më shikonte se regjia e lëvizte kamerën se unë duhet të isha e fortë, por ishte e pamundur të mos përfshihesha. Jam nënë vetë dhe e di shumë mirë një moment kur nuk përgjigjet fëmija. Kam shumë pengje sepse nëse do vazhdonte ai emision, ndoshta atyre njerëzve do tu jepej mundësia që të gjendeshin. Pengje kam përsa i përket dosjes së fëmijëve të humbur që janë të shumta dhe këtë e them me keqardhje dhe fatkeqësisht nuk janë të gjetur.
Akoma më shkruajnë mesazhe kur do rikthehesh sepse ndoshta emisioni ka qenë e vetmja dritare për këta dhe këtu doja ti bëja një thirrje dhe organeve të policisë apo ministrisë së brendshme, duhet të hapin një zyrë që të jetë për kërkimin e njerëzve të zhdukur sepse Shqipëria ka shumë. Kam pasur mbi 4 mijë dosje njerëzish të humbur. Shumica kanë qenë të ikur në emigracion”, tha Shtino.
Sa i përket historive që e kanë goditur më shumë dhe mund ta kenë lënë disa netë pa gjumë, përmend: “Bleona Matën, Juliana Hoxhën. Ka qenë historia e Altin Zekës për të cilin kemi kërkuar shumë, kemi zbuluar të gjithë itinerarin se ku mund të kishte qenë dhe të gjitha informacionet na çonin në Londër, shpesh herë mendonim se ishim afër tij, por zbrazej komplet gjithë piramida që ngrihej”, tha ajo për Fax News.
Diskutime rreth kësaj post