“Rama është një rrezik kombëtar”, vjen reagimi i parë nga aleati i Bashës, paralajmëron lëvizje të menjëhershme pas miratimit të Kodit Zgjedhor

Partia Republikane me anë të një deklarate për mediat e ka cilësuar akt kriminal votimin e sotëm të ndryshimeve në Kodin Zgjedhor.

Kreu i saj, Fatmir Mediu thotë se me këtë gjest, kryeministri Rama vulosi turpin e tij.

“DEKLARATË E PARTISË REPUBLIKANE

Edi Rama dhe sekti i tij në një akt kriminal miratoi në një parlament antikushtetues, qesharak, të shitur dhe antikombëtar Kodin Zgjedhor, duke vulosur kështu turpin e vet, duke treguar qartë se nuk ndalet në manipulimin e zgjedhjeve në Shqipëri.
Rama është një rrezik kombëtar, ka shkatërruar shtetin, kushtetutën, zgjedhjet e lira dhe të ndershme, ka sabotuar qëllimisht rrugën tonë kombëtare.
Shqiptarët do fitojnë, kjo kërkon që opozita të ndërtoëe kualicion më gjithë shqiptarët në çdo qytet e fshat, në çdo qendër votimi, për të organizuar qëndresën kundër manipulimit të zgjedhjeve nga Rama dhe krimi i organizuar.
Detyra e çdo qytetari është të mbrojë lirinë e vet, të familjes dhe Shqiperinë me çdo kusht. Opozita duhet t’i prijë këtij procesi!”, – reagon PR.

Kuvendi miratoi sot me 107 vota pro Kodin e ri Zgjedhor, i cili sjell një mori ndryshimesh në mënyrën se si zgjidhen deputetët, por edhe kufizon mundësitë për koalicione.