Zv. ministrja e Shëndetësisë Mira Rakacolli, njëherazi drejtuese e Komitetit të Ekspertëve i ka bërë thirrje qytetarëve të mos e ulin vigjilencën ndaj koronavirusit.
Ajo tha se është e domosdoshme ruajtja e distancës, mbajtja e maskës në ambientet e mbyllura dhe kujdesi për higjienën personale.
“Ministria e Shëndetësisë dhe Mbrojtjes Sociale ju bën thirrje qytetarëve që të mos e ulin vigjilencën për asnjë moment.
Të ruajnë distancimin fizik, të vendosin maskën detyrimisht në ambientet e mbyllura dhe kudo ku nuk ruhet distanca, të kujdesen për higjienën personale.
Bizneset dhe institucionet publike duhet të zbatojnë me përpikmëri protokollet e miratuara të sigurisë, për të ruajtur shëndetin e qytetarëve.
Në rast se dyshoni se jeni të prekur nga COVID19 dhe keni shenja të sëmundjes, të telefononi menjëherë Urgjencën Kombëtare në numrin 127 ose në linjën e gjelbër falas 0800 40 40 për t’u lidhur me mjekun tuaj të familjes”, – tha Rakacolli.
Ajo bëri edhe një bilanc të të prekurve në javën e shkuar, duke deklaruar se është regjistruar një mesatare prej 145 të prekurish në ditë.
Rakacolli u shpreh se situata epidemiologjike në vendin tonë u paraqit e qëndrueshme.
“Situata epidemiologjike në vend në javën e fundit paraqitet e qendrueshme. Sipas të dhënave javore rezulton se mesatarja e rasteve ditore është 145 raste.
Gjatë kësaj jave ka vijuar edhe rritja e testimeve bazuar në gjurmimin dhe hetimin epidemiologjik.
Siç jeni në dijeni, Ministria e Shëndetësisë dhe Mbrojtjes Sociale ka liçensuar edhe subjekte jopublike për testimin.
Në testimet përfshihen testimet në strukturat publike dhe rastet për konfirmim diagnoze që rezultojnë të dyshuara ose pozitive në strukturat jopublike të liçensuara, sipas vlerësimit të IShP”, – tha Rakacolli.
Në 24 orët e fundit u konfirmuan pozitivë 156 raste të reja me Covid-19 nga 837 testime të kryera në total, ndërsa u regjistruan 5 viktima.
Diskutime rreth kësaj post