Presidenti Ilir Meta ka shtuar sulmet dhe akuzat në drejtim të kryeministrit Edi Rama. Situata e rëndë e krijuar në pikat kufitare të Kakavijës dhe Kapshticës ka bërë që kreu i shtetit të shtojë më tepër inatin për kryeministrin, duke e bërë përgjegjësin kryesor për situatën e krijuar. Në një dalje për mediat, Meta deklaroi se qeveria nuk ushtroi përgjegjësinë e duhur ndaj shtetasve të saj.
“Ditët e fundit të gjithë jemi tronditur nga situata e jashtëzakonshme humanitare që u krijua në Kakavijë, ku mijëra emigrantë dhe shtetas shqiptarë, fëmijë e të moshuar, u lanë me ditë të tëra të braktisur dhe në kushte tejet të vështira. Kam qenë gjithmonë dhe vazhdoj të mbetem bashkëpunues me qeverinë, për t’u bërë pjesë e sensibilizimit e duke vepruar dhe apeluar vazhdimisht mbi përgjegjësinë që secili duhet të marrë për të kapërcyer së bashku, me sa më pak kosto, situatën e pandemisë COVID-19 në Shqipëri. Situata e krijuar në Kakavijë ka të bëjë vetëm me përgjegjësitë e paushtruara në kohën e duhur nga ana e qeverisë shqiptare ndaj shtetasve të saj”, tha Meta.
Akuzat e Metës
Kreu i shtetit theksoi më tej se për çdo situatë të krijuar, qeveria nuk mban asnjë përgjegjësi dhe sipas tij gjen justifikime dhe e drejton gishtin për të fajësuar palën greke.
“Ashtu siç ka ndodhur shpeshherë, qeveria gjen justifikimet duke drejtuar gishtin nga ana tjetër e kufirit ndërkohë që është përgjegjësia e saj parësore të marrë të gjitha masat dhe të kujdeset në kohën e duhur për shtetasit e saj. Çfarë informacioni dhe sqarimi u është dhënë njerëzve që udhëtojnë jashtë vendit dhe në mënyrë të veçantë atyre që udhëtojnë për në Greqi? Çfarë paralajmërimesh dhe parashikimesh në kohën e duhur ka bërë qeveria shqiptare? A ka patur ndonjë njoftim zyrtar nga Ministria e Europës dhe Punëve të Jashtme mbi kuotën e leje kalimit prej 700 personash në ditë? Përgjegjësia është vetëm mbi qeverinë shqiptare dhe shtetin”, – u shpreh presidenti Meta.
Ja shantazhet me letra ambasadorësh
Por presidenti Ilir Meta, në vijimësi të akuzave të tij, ka publikuar një e-mail, sipas së cilit tregon se ambasada shqiptare në Greqi i ka paralajmëruar autoritetet shqiptare për masat e marra nga shteti fqinj. E-maili mban datën 5 gusht dhe sipas Metës pavarësisht këtij informacioni, autoritet shqiptare nuk janë mobilizuar me qëllim që të parandalonin kaosin në Kakavijë. Ai nuk i kursen edhe ironitë për kryeministrit Edi Rama.
“Falënderoj autoritetet greke për korrektësinë e tyre! Falënderoj Ambasadën e Shqipërisë në Greqi, që ka kryer me korrektësi shembullore paralajmërimin e menjëhershëm të ministrit për Europën dhe Punët e Jashtme, ende në detyrë, Rama. Edhe njëherë ndjesë të gjithë bashkëqytetarëve tanë, të cilët hoqën vuajtje çnjerëzore sepse ministri ynë i Jashtëm, i cili është edhe kryeministër, po pushon për shtatë palë qejfe”, – tha Meta.
Presidenti nuk i ka kursyer ironitë, duke thënë se do i dërgojë një kalendar të datave që ka më shumë fluks të emigrantëve që ta kenë parasysh.
“Isha i detyruar që të reagoja më qartë se në vend të një situate me përgjegjshmëri, ndjeshmëri dhe shqiptarizëm se janë njerëzit tanë që mbajnë vendim për 30 vite me sakrificat e tyre, kur pashë që po u vihej faji atyre për detyrat e pakryera në kohë nga ana e institucioneve shqiptare, sigurisht isha i detyruar që të përshkallëzoja reagim. Nga dita e nesërme do i çoj një kalendar qeverisë sipas vlerësimit të institucionit tonë për të parandaluar raste të tilla, duke pasur parasysh frekuencën e kalimit në kufi, që nga Pashkët, Krishtlindjet, Viti i Ri, kohën kur vijnë në pushime dhe kur largohen që të mbajnë punën atje”, – tha Meta.
Diskutime rreth kësaj post