Akademiku Artan Fuga ka renditur 5 rrafshet të cilat e çojnë Shqipërinë drejt një shoqërie demokratike. Fuga thotë se emancipimi i politikës shqiptare do të vijë kur politika të depolitizojë shoqërinë.
Postimi i profesor Fugës
“Pavarësisht të gjitha përpjekjeve të bëra nga qytetarët dhe partnerët e huaj miq të Shqipërisë, demokratizimi, sado rezultate të ketë pasur, përsëri është te ne shumë larg modelit standard. Kur flasim për shoqëri demokratike mbaj parasysh që ka disa karakteristika thelbësore që e përbëjnë dhe midis tyre pesë kryesore :
Pushteti të mos jetë piramidal që të përfundojë në duart e një personi të vetëm qoftë ky president apo kryeministër.
Partia në fuqi të mos të kontrollojëtë gjithë Kuvendin, pra procesin ligjbërës dhe që andej edhe të gjitha organet e tjera kushtetuese, si edhe të gjitha pushtetet, ekzekutiv, gjyqësor, parlamentar.
Administrata të mos jetë e ndërtuar nga militantë të përdorur si gurë peshe në balancën elektorale, si ruajtës votash në komisione elektorale, dhe e përbërë nga militantë, e kontrolluar nga ministra politikë.
Qytetari të mos jetë i kushtëzuar nga politika në jetën e tij të përditshme, në veprimtarinë e tij profesionale, ekonomike, etj.
Fushat e shoqërisë të funksionojnë sipas logjikës të tyre të brendëshme dhe jo sipas qejfeve dhe interesave politike, si ekonomia, shkenca, kultura, etj.
Me një fjalë kërkohet një depolitizim i pushtetit, i veprimtarive dhe sektorëve themelorë të jetës ekonomike dhe shoqërore, si edhe i jetës të përditshme të qytetarit.
Emancipimi i politikës në Shqipëri do të ndodhet kur politika të depolitizojë shoqërinë në këto pesë rrafshe. – shkruan Artan Fuga.
Diskutime rreth kësaj post