Erjon Braçe: Amnistia fiskale i drejtohet një fashe të gjerë njerëzish, ja sa pritet të shkojë borxhi publik

Amnistia fiskale pas një sërë reagimesh dhe debatesh u shty për miratim në vjeshtë. Zëvendëskryeministri Erjon Braçe ka reaguar ditën e djeshme për këtë çështje, duke u shprehur se amnistia fiskale u adresohet një fashe të gjerë qytetarësh.

Gjatë një interviste televizive, Braçe deklaroi se kjo shtyrje u jep mundësi faktorëve të ndryshëm që të shprehen. Ndërsa duke iu referuar sulmeve të ndryshme në drejtim të amnistisë, zv.kryeministri tha se kjo është një nismë shumë e rëndësishme dhe një gjë e tillë pritej.

“Ka një draft që ka kaluar në qeveri dhe që ka shkuar në Parlament. Natyrisht është një nismë e rëndësishme, afërmendsh që do të sulmohet. Amnistia i adresohet një fashe shumë të gjerë njerëzish, por nuk ka asnjë cedim në këtë histori. Është shumë mirë që kjo periudhë i jep më shumë kohë faktorëve që të shprehen për të”, – tha Braçe.

Më tej zv.kryeministri iu është përgjigjur edhe akuzave të opozitës për borxhin publik, i cili do shkojë deri në 80 për qind të Prodhimit të Përgjithshëm Kombëtar.

“Pse unë e komandova pandeminë të vijë në fund të mandatit? Nuk e doja fare, se isha shumë mirë deri në fund të vitit që shkoi pavarësisht tërmetit. Me aktin e fundit normativ do të shkojë 80,04% e Prodhimit të Përgjithshëm Kombëtar”, – tha Braçe.

Një tjetër nismë e qeverisë që u lançua po në kulmin e pandemisë, nga vetë kreu i qeverisë, ishte dhe ajo për legalizimin e kanabisit mjekësor. Nga zhurma e madhe e reagimeve që pasoi deklarata publike e kryeministrit, kur tha se po punohej me ekspertë vendas e të huaj prej afro një viti, dritën e diellit nuk ka parë ende asnjë draft zyrtar.

“Ka një grup pune që po merret me këtë gjë, kur të vijë në tavolina, natyrisht që mund të them më tepër”, tha Braçe.

Pandemia nuk ka ndikuar vetëm te punët e qeverisë socialiste, por edhe të partisë. Të paktën ky është argumenti i forcës kryesore politike në vend, e cila nuk po arrin të zgjedhë kryesinë dhe sekretariatin nga asambleja e re, e cila u zgjodh 10 ditë para se pandemia e koronavirusit në Shqipëri të konfirmohej zyrtarisht.