Partia Demokratike ka denoncuar dje Ministrinë e Shëndetësisë. Ish-deputeti i PD-së, Bardh Spahia ka sulmuar ashpër qeverinë në lidhje me situatën që po kalon vendi për shkak të COVID-19.
Ai ka publikuar edhe disa mesazhe, ku një personel mjekësor shkruan se pacientët me COVID-19 dërgohen tek reanimacioni qendror, vetëm për të mos i regjistruar si pacientë të infektivit. Duke u dalë në mbrojtje bluzave të bardha, Spahia theksoi se edhe pse janë përballë ekspozimit nga rreziku i koronavirusit, ata lihen pa shpërblime.
“U nxjerr foto dhe bën video propagande me personelin shëndetësor, që janë vërtet heronj në përballjen me virusin Covid-19. Por çfarë ministrja e Shëndetësisë nuk thotë është se nën pushtetin e Rilindjes, ata janë disafish heronj, sepse punojnë në kushte skandaloze, u imponohet trajtimi i të prekurve me Covid në reparte edhe jashtë atyre të caktuara, e detyrohen të shohin, sesi shpërblimet jepen me preferenca, e jo sipas punës.
Denoncimet që vijnë nga shërbimi i urgjencës, ashtu edhe nga reanimacioni qendror në QSUT, flasin për vlerësim të personelit jo në bazë të punës dhe performancës, por sipas parapëlqimeve të drejtorisë së QSUT, për t’u dhënë shpërblime, ç’ka krijon problematika në mjekimin si duhet, të pacientëve me Covid-19! Se si mund të mendohet për ndasi dhe preferenca, me pacientë që humbin jetën çdo ditë, këtë vetëm makutët e emëruar të Rilindjes e dinë”, – tha Spahia.
Me anë një postimi në rrjetin social Facebook, Spahia ka shkruar se denoncimet e personelit mjekësor flasin vetë. Ai shprehet se MSH po menaxhon në mënyrë skandaloze situatën.
“Denoncimet flasin për një menaxhim skandaloz të infeksionit, në limitet e surreales: pacientë me Covid që dërgohen tek reanimacioni qendror, vetëm për të mos i regjistruar si pacientë të infektivit!!! Reanimacioni qendror i shndërruar në një repart jo zyrtar Covid, duke mos patur mbrojtjen e duhur dhe me mangësi të theksuara në mjete, ka të infektuarit e vet, së fundmi 2 mjekë e 5 infermierë. Ja pra si shndërrohen repartet e QSUT në vatra infeksioni, sepse për turp, bëhet cirk me të sëmurët me Covid-19, pasi meraku është falsifikimi i shifrave, e jo kujdesi shëndetësor ndaj tyre, e siguria e vet personelit”, – thuhet në postimin e tij.
Diskutime rreth kësaj post