Gazment Bardhi përgënjeshtron Ramën, zbardhet kërkesa urgjente menjëherë pas mbledhjes

Sekretari i Përgjithshëm i PD, Gazment Bardhi u shpreh se nuk u mor përgjigje kur miratohet draft-ligji pa ndryshime për Reformën Zgjedhore.

Bardhi ka kundërshtuar një deklaratë të kryeministrit Rama, sipas të cilit opozita e bashkuar kërkoi kohë për t’u konsultuar. “Nuk kemi kërkuar kohë, por u kemi dhënë kohë”, ka theksuar Bardhi.

“Për 6 muaj Këshilli Politik ka qenë në një punë të vijueshme, për të dakordësuar çështjet për zgjedhjet. Marrëveshja e 5 qershorit pret miratimin nga Parlamenti. Ne i kërkuam informacion Ramës se kur do të ndodhë miratimi i kësaj marrëveshje. Nuk kemi marrë përgjigje se kur votohet pa ndryshime, nga ana e kryetarit të PS.

Konfirmoj se Opozita e Bashkuar i qëndron Marrëveshjes të 5 qershorit. Ishte një marrëveshje konsensuale që u mbështet dhe u ndërmjetësua nga ndërkombëtarët. Ne na u konfirmua se do duhet të rihapim çeshtje për të cilat kemi rënë dakord. Nuk mund të hedhim në kosh një punë 6 mujore në Këshillit Politik. Ne nuk mundemi pasi kemi firmosur, të themi që kemi ndryshuar mendje. PS kërkon t’i rihape çështjet..”, tha Bardhi.