Erdhi nga Italia dhe doli xhiro në fshat, gjobitet me 700 mijë lekë i riu nga Dibra

Një 29-vjeçar nga Dibra është personi i parë i ardhur nga zonat e kuqe që është gjobitur nga policia, pasi ka thyer rregullin e vetëkarantinimit. I riu me inicialet E. S., ishte kthyer nga Italia me datën 3 mars dhe pavarësisht se me anë të celularit i ishte bërë thirrje që të vetëkarantinohet, ai nuk e zbatoi këtë urdhër, duke u shndërruar në një rrezik serioz për të gjithë banorët e fshatit. Për pasojë është gjobitur 700 mijë lekë.

“Strukturat e Policisë vijojnë kontrollet në banesat e personave të kthyer nga vendet e prekura nga COVID-19. Thyen rregullin për vetëkarantinim, gjobitet nga Policia një 29-vjeçar. Gjobitja me masë administrative në vlerën 700.000 lekë, për shtetasin E. S., 29 vjeç, banues në Dibër.

Ky shtetas, më datë 03.03.2020 është kthyer nga Italia dhe është njoftuar nga specialisti i Policisë së zonës për vetëkarantinim 14-ditor, për shkak se vinte nga një zonë e prekur nga virusi COVID-19, gjë të cilën nuk e ka respektuar. Gjatë kontrolleve që ka bërë, Policia ka konstatuar se ky shtetas ka frekuentuar ambiente të jashtme në fshatin e tij. Në zbatim të Aktit Normativ Nr. 3, datë 15.03.2020 ”Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga virusi COVID-19″, Policia e ka ndëshkuar këtë shtetas, me masën administrative në vlerën 700.000 lekë. Policia apelon edhe njëherë për të gjithë ata shtetas që janë njoftuar për vetëkarantinim që të zbatojnë me rigorozitet këtë detyrim në të mirë të shëndetit të tyre dhe njerëzve të tjerë”, njofton policia.

Të gjithë të ardhurit nga Italia dhe zonat e tjera të prekura janë të detyruar që të vetëkarantinohen në shtëpi, me qëllim parandalimin e përhapjes së koronavisurit. Janë 117 mijë të ardhur nga zonat e kuqe, referuar shifrave zyrtare, të cilët do duhet të vetëkarantinohen. Atyre u dërgohet një mesazh në celular dhe janë marrë në celular që u kërkohet të vetëkarantinohen, për ata që nuk zbatojnë urdhrin, sipas aktit normativ të miratuar së fundmi, do të ndëshkohen me gjobë.