Për avokatin Spartak Ngjela, kërkesat e opozitës për qeveri teknike dhe zgjedhje të parakohshme janë të pamundura. Sipas tij nuk mund të shkohet drejt shembullit maqedonas. Gjatë një reagimi për gazetën “SOT”, avokati u shpreh se një shtet demokratik i drejtohet zgjedhjeve të parakohshme vetëm në rastet kur ka një krizë parlamentare, pra që nuk është kuorumi i nevojshëm i ligjvënësve, ku theksoi se këto strategji janë të ish-kryeministrit Sali Berisha dhe jo të kreut aktual të opozitës, Lulzim Basha.
Sipas tij, opozita kërkon të vijë në pushtet me protesta dhe molotov. “Është shumë larg që vendi të shkojë drejt shembullit maqedonas. Duhet të kuptojmë një gjë: qeveritë teknike vijnë në momentin e krizave parlamentare. Një krizë parlamentare do të thotë që Parlamentit i humbet numri për të kryer votimet. Por kur palët nuk e shohin të arsyeshme që të shkojnë në zgjedhje të reja, ose, pranojnë shkojnë në zgjedhje të reja, por caktojnë një qeveri teknike që e zgjedhin të gjitha palët në Parlament. Pastaj kjo qeveri teknike, për 2 ose 3 muaj, siç e vendos Kuvendi, përgatit zgjedhjet. Ku e kemi ne një situatë të tillë? Kryetari i PD, kuptohet se e di këtë gjë, por ai nuk e ka mendimin e tij: ky sigurisht që është mendimi i Saliut. Basha filloi duke thënë se “ne nuk e pranojmë këtë qeveri dhe duam zgjedhje të reja”, por politikisht nuk e realizoi dot këtë akt. Nuk bashkëpunoj me këtë qeveri, tha, se ajo ka manipuluar votat, doli në revolta dhe kërkonte destabilizimin e Shqipërisë, deri në përdorimin e molotovëve”, tha Ngjela.
Frika nga reforma në drejtësi
Më tej, avokati u shpreh se planet e Berishës për zgjedhje nuk po i përkrahë asnjë politikë e lartë ndërkombëtare, ku theksoi se kriza politike që ka përfshirë vendin është e qëllimshme nga Berisha dhe Meta sepse kanë frikë nga reforma në drejtësi. Sipas avokatit, këta nuk pranojnë reformën në drejtësi sepse janë të kapur në afera.
“Fakti që PD nuk e ka ndryshuar lidershipin, pasi është përsëri Sali Berisha me faktorin e tij familjar në krye të Partisë Demokratike, shqiptarët nuk i përkrahin. Atëherë çfarë zgjedhje kërkojnë këta? Cila është ajo politikë e madhe që i përkrah? Asnjë. Ne sot jemi në një situatë të tillë, sepse liderët e PD nuk pranuan reformën në drejtësi, bashkë me Metën. Por këta nuk e ndaluan dot. Kanë ende shpresë të bëjnë këtë pengesë për reformën, kjo po kuptohet. Por janë të pafuqishëm. Këta nuk e pranojnë reformën në drejtësi sepse ajo i kap. Pushteti gjyqësor aktual ka qenë i tyre. Saliu mori 6-mujorët, injorantë të gjithë, dhe 90 për qind e tyre përkrahën dhe futën korrupsionin masiv në vend.
Por vetingu po i heq. Ata i kanë bërë një dëm shumë të madh shoqërisë shqiptare: kanë shkatërruar drejtësinë”, u shpreh Ngjela. Avokati shtoi se reformën në drejtësi e kanë marrë përsipër SHBA dhe BE dhe do ta çojnë deri në fund. “Edhe PS është e implikuar në këtë gjendje, por, përsa i përket reformës në drejtësi dhe tendencave ndërkombëtare të politikave amerikane dhe gjermane, nuk i kanë rënë ndesh dhe duan të vazhdojnë reformën. Reformën në drejtësi e ka marrë përsipër ta çojë deri në fund ndërkombëtarët, sidomos politika amerikane. Dhe shqiptarët po e presin me padurim. Shqipëria me opozitën që u largua nga Parlamenti nuk pranonte as të strukturonte pushtetin vendor. Politika e lartë amerikane dhe perëndimore duan të konstituojnë rajonet. Ata kanë parashikuar katër rajone për Shqipërinë”, tha Ngjela.
Diskutime rreth kësaj post