Kryeprokurori Olsian Çela ka marrë mbështetjen e SHBA-së dhe BE-së në misionin e tij për të luftuar krimin dhe korrupsionin. Dje në zyrën e tij ka shkuar zv/ambasadorja e SHBA-ve, Leyla Moses- Ones dhe ambasadori i BE-së Luigi Soreca, të cilët i kanë ofruar mbështetje në krye të organit të akuzës.
Në takimin e zhvilluar dje, përfaqësuesja e SHBA ka bërë të qartë se do të ketë asistencë për të goditur korrupsionin dhe krimin e organizuar, ndërsa ja u bëri të qartë armiqve të reformës në drejtësi se ajo gëzon mbështetjen e SHBA. Kështu, SPAK dhe reforma në drejtësi mbështeten plotësisht nga SHBA-ja.
“E Ngarkuara me Punë, Leyla Moses-Ones dhe Ambasadori i BE, Luigi Soreca u takuan sot me Prokurorin e Përgjithshëm të sapozgjedhur Olsian Çela. E Ngarkuara me Punë përsëriti sërish mbështetjen e Shteteve të Bashkuara për reformën në drejtësi dhe rolin e rëndësishëm që institucionet e prokurorisë luajnë në luftën kundër krimit ndërkombëtar dhe korrupsionit”, thuhet në njoftimin e ambasadës amerikane.
Por ambasadori i BE shkoi dhe më tej, pasi ka kërkuar që të nisin hetimet pasurore për të korruptuarit dhe krimin e organizuar. Sipas Sorecës, me rëndësi është që të ndiqen metoda proaktive në zbulimin parave të pista dhe pasurive korruptive.
“Së bashku me Leyla Moses-Ones takuam Prokurorin e Përgjithshëm të sapozgjedhur Olsian Çela. Ne diskutuam prioritetet kryesore të zyrës së tij të re, përfshirë rolin e rëndësishëm të hetimeve proaktive financiare, veprimin e zyrave të prokurorisë pas tërmetit, si dhe fazën kalimtare drejt krijimit të SPAK. Zgjedhja e Z. Çela është një tjetër hap i rëndësishëm përpara në zbatimin e reformës në drejtësi, e cila është prioritet kryesor për Shqipërinë në rrugën e saj të integrimit në BE”, njoftoi ambasada e BE.
Pra duket qartë se SHBA-BE kërkojnë që të nisë sa më shpejt lufta ndaj të korruptuarve. Interesante është se kërkohet që të nisin dhe hetimet financiare, duke zbuluar kështu pasuritë miliona euroshe të pushtetarëve. Shumë emra në politikë kanë deklaruar politikisht se nuk kanë kryer asnjë shkelje, por pasuria tregon të kundërtën. Ka emra të njohur me 4-5 shtëpi, vila në bregdet e llogari miliona eurosh. Por këto duket se do u kthen në bumerang shumë shpejt. Kjo falë asistencës dhe të SHBA-BE.
Takimi me ambasadorin gjerman
Olsian Çela dje ka zhvilluar një takim edhe ambasadorin e Gjermanisë, Peter Zingraf. Ky i fundit gjithashtu në fokus vendosi reformën në drejtësi, ndërsa përgëzoi zgjedhjen e Çelës Kryeprokuror dhe zgjedhjen e tij nga Parlamenti.
“Gjermania, së bashku me Bashkimin Evropian, ka mbështetur gjithmonë zbatimin e reformës në drejtësi në Shqipëri dhe do ta vijojë të bëjë këtë edhe në të ardhmen. Zgjedhja e Prokurorit të Përgjithshëm përmes Parlamentit pas verifikimit dhe vlerësimit të kandidatëve nga Këshilli i Lartë i Prokurorisë është një hap thelbësor në zbatimin e reformës në drejtësi dhe do të konsolidojë besimin e qytetarëve në sistemin e drejtësisë. I uroj Prokurorit të ri të Përgjithshëm shumë forcë dhe suksese në detyrën e tij të rëndësishme”, njoftoi ambasada.
Kujtojmë se javën e dytë të nëntorit, kryeprokurori Olsian Çela në intervistën pranë KLP-së deklaroi se do sjellë një frymë të re në krye të organit të akuzës. Dje ai ka marrë mbështetjen e ndërkombëtarëve dhe sinjalet janë se viti që vjen do të sjellë reprezalje në politikë.
Diskutime rreth kësaj post