Kryeministri Edi Rama ndodhet sot në Libofshë të Fierit ku po shpërndan certifikata pronësie për banorët që kanë përfituar legalizimin e banesës.
Ai u ndal tek çështja e nxehtë e ditës, protesta e banorëve të Unazës së Re që preken nga shembjet. Pas protestës së dhunshme dje përpara parlamentit, Rama ka zbutur tonet dhe tha se shteti nuk do të lërë jashtë familjet që preken nga shembjet. Ai tha se do ketë plan individual për secilin prej tyre. “Ata që kanë certifikatë pronësie skanë pse bërtasin se do marrin paratë e dëmshpërblimit”. Ndërsa për ata që nuk janë legalizuar, Rama tha se shteti do të marrë masa për strehimin e tyre.
Pjesë nga deklarata e Kryeministrit për banorët e Unazës së Re nga Libofsha e Fierit:
E keni parë besoj se është krijuar një situatë artificiale në Tiranë për qëllime politike. Nuk i shmangemi dot kësaj teme, përderisa këtu po flasim për legalizime. Aty ku ke zënë hapësirën aty ku është plani për rrugë, kopshte, shkollla nuk të legalizoj. As nuk mundet shteti të japë paratë të gjithëve sikur të ishe pronar. Nuk mundet që i gjithë populli të punojë duke paguar ata që janë të palegalizuesh. Sidoqoftë shteti ka përgjegjësi për njerëzit që kanë ndërtuar shtëpi për të banuar. Atyre do tu paguhet bonusi i qirasë. Pra ka diçka të arsyeshme që prishja e një godine për projekt publik në një kohë të ngushtë, nuk mund të lihet një familje jashtë. Duhet ta kuptoni në gjithë këtë tymnajë me gënjeshtra e sajesa me lloj lloj mjete dizinformi për të çorientu miletin.
Qysh se kanë nisur prishjet masive, gjithë qeveritë kanë prishur dhe kurrë ska patur protestë nga opozita. Ata nuk janë aty për të mbrojtur shtëpitë, por për interesa të ngushta politike. Luftë për pushtet. Edi Ramën se mundim dot me votë dhe shfaqen kudo ku del mundësia për të hedhur benzinë. Kjo është ajo që ka ndodh. Atje ka godina biznesesh, nuk janë të gjithë hallexhinj. Sidoqoftë do të gjendet zgjidhja për të mos lënë familjet jashtë, pasi projekti i rrugës duhet të realizohet.
Diskutime rreth kësaj post