Kompania Samsung është duke zhvilluar një sistem të veçantë të televizorit, që një ditë do t’ju lejojë përdoruesve të ndërrojnë kanalet dhe volumin e zërit duke përdorur trurin në vend të telekomandës. Projekti i quajtur “Ponthius” është pjesë e një bashkëpunimi mes gjigantit të Koresë së Jugut dhe Qendrës Neuroprostetike në Lozanë të Zvicrës.
Qëllimi i këtij projekti është që t’ju mundësojë njerëzve me aftësi të kufizuara të shijojnë emisionet e tyre të preferuara pa ndihmën e të tjerëve. Kompania ka prezantuar prototipin gjatë një konference të mbajtur gjatë javës së kaluar në San Francisco.
“Si mund t’ju ofrojmë qasje personave që nuk mund të lëvizin apo të cilët kanë kufizime ekstreme në lëvizje”, ka deklaruar një shkencëtar në EPFL, Ricardo Chavarriaga.
“Jemi duke zhvilluar një teknologji që është më shumë komplekse, më inteligjente, por nuk duhet të harrojmë se kjo teknologji është duke u zhvilluar që të interferojë te njerëzit”, ka shtuar Chavarriaga.
Sistemi përdor kompjuterin-tru (BCI) që ndihmon shikuesin të lidhet me menynë e televizorit. BCI mbështetet në kufjet me 64 sensorë dhe që ka gjurmues që funksionon me lëvizje të syrit.
Shkencëtarët aktualisht janë duke përdorur mostrat e valëve të trurit, që përcaktojnë se si truri sillet kur kemi dëshirë të shikojmë ndonjë film. Gjithashtu është duke u zhvilluar një softuer që mbledh informacione për shikuesin dhe preferencat e tij dhe kështu vepron në bazë të kërkesave të tij. /Telegrafi
Diskutime rreth kësaj post