Për ata që janë tërbuar nga “Air Albania” dhe thonë “këtë na e bëri turku”

Nga Enver Robelli

Air Albania!

Air Albania sot ka filluar fluturimet. Disa gëzohen, disa tërbohen.

Ata që tërbohen, thonë: na e bëri «turku» këtë kompani, nuk qemë të zotë ta bëjmë vetë.

Përzihet këtu edhe një dozë mërzie e racizmi paushall kundër Turqisë.

Qetësohuni.

Është lajm fantastik.

Air Albania!

Me shqiponjë. Me ngjyrat kuq e zi.

Dhe shpresojmë me miliona pasagjerë nga Europa Perëndimore në Tiranë.

Hallin e shqiptarëve superpatriotë e kanë edhe zviceranët.

Politikanët neoliberalë të Zürichut para disa vitesh me paaftësinë e tyre e kanë falimentuar kompaninë ajrore Swissair.

Sot pronar i kompanisë pasardhëse Swiss është Lufthansa e Gjermanisë.

Të dyja dhe plot kompani të tjera, përfshirë Turkish Airlines, Air Canada, Austrian Airlines, TAP Portugal, Air China, Air India etj, etj. janë pjesë e Star Alliance.

Në botën e globalizuar gati askush s’mund të mbijetojë vetëm, së paku jo në ajër.