Dorëheqja e Tahirit, SHBA: Të arrestohen Balili e Çekaj

“Mirëpresim faktin që Saimir Tahiri do të përballet me drejtësinë si qytetar i zakonshëm”.

Kështu tha ambasadori amerikan në vendin tonë, Donald Lu, në një aktivitet të mbajtur paraditen e sotme për shoqërinë civile dhe gazetarë, duke komentuar dorëzimin e mandatit të deputetit.

Ai tha se hetimet po vijojnë për ish-ministrin Tahiri dhe ish-kryeprokurorin Adriatik Llalla, duke shtuar se askush nuk është i paprekshëm.

“Askush nuk është mbi ligjin. Mirëpresim faktin që Tahiri do të përballet me drejtësinë si qytetar i zakonshëm, pa imunitet”, – nënvizoi z.Lu.

Ambasadori tha se do ishte i lumtur nëse shoqëria civile u bashkohet thirrjeve për arrestim të peshqve të mëdhenj kriminelë.

Sipas tij, Shqipëria ka mbështetur kapjen e një peshku të madh, si Met Kananai që u kap në Turqi.

“Dy urdhër arreste janë lëshuar edhe për dy peshq të tjerë. Klement Balili dhe Arbër Çekaj. Ata duhet të kapen. Fran Frrokaj dhe Roshi po ndiqen penalisht, hetimet po vazhdojnë ndaj Tahirit dhe Llallës, askush nuk është mbi ligjin”, deklaroi ambasadori amerikan.

Më tej shtoi se shoqëria civile luan rol të rëndësishëm si rojtare e fenomeneve të caktuara.

Por ambasadori nënvizoi se shoqëritë civile duhet të bëhen më të pavarura financiarisht dhe më të suksesshme.