Lajme.al ju uron Gëzuar Vitin e ri 2018

Përmes një spektakli fishekzjarresh dhe urimeve të shkëmbyera më parë, shqiptarët i kanë dhënë mirëseardhjen Vitit të Ri 2018.

Mijëra qytetarë u janë drejtuar shesheve qëndrore pas mesnate, për të festuar orët e para të ndërrimit të viteve.

Fishekzjarrët e hedhura nga pushteti lokal, por dhe individualisht nga qytetarët, kanë përshëndetur kështu datën 1 Janar 2018.

Në Tiranë, festimet në shesh kanë nisur më herët përmes koncertit të organizuar nga Bashkia.

Emrat e njohur si Elhaida Dani, Kastro Zizo, Beatrix Ramosaj, Elgit Doda dhe Ronela Hajati kanë qenë protagonistët e një koncerti të nisur që në orën 22:30 të së dielës në sheshin “Skënderbej”.

Ndërkohë mësohet se mijëra forca policore dhe mjekë të spitaleve rajonale janë në gadishmëri për të siguruar mbarëvajtjen e festimeve.

Më herët, zyrtarë të lartë të Policisë së Shtetit njoftuan se plot 4 mijë efektivë do të sigurojnë rendin në vend, ndërsa bënë apel për shmangien e alkoolit nga drejtuesit e mjeteve.

Në planin e masave për çdo qytet është përfshirë mbajtja në kontroll e situatës në veçanti në sheshe publike dhe pranë restoranteve të cilat kanë organizuar aktivitete të ndryshme gjatë festës.

Burime zyrtare raportojnë se fatmirësisht nuk është shënuar asnjë incident serioz gjatë mbrëmjes së ndërrimit të viteve.

Lajme.al i uron të gjithë shqiptarët për një vit të begatë, me shëndet dhe lumturi në çdo vatër familjare.