4 policë të plagosur gjatë superoperacionit, arrestohen serbë, shqiptarë e boshnjakë. KFOR ngre helikopterët mbi Veriun e Kosovës

Policia e Kosovës njofton se gjatë operacionit që po zhvillon në disa rajone të ndryshme të veriut të Kosovës, përfshirë komunat Zveçan, Zubin Potok, Leposaviç, Mitrovicë e Veriut, Mitrovicë e Jugut, Skënderaj dhe Drenas, kanë arrestuar disa zyrtarë serbë, por edhe shqiptarë e boshnjakë që shërbenin në Policinë e Kosovës në këto rajone.

Sipas Policisë, të gjithë janë të dyshuar për veprimtari të kundërligjshme, si kontrabandë mallrash.

Nga ky aksion i policisë janë plagosur katër polic deklaron zëdhënësja e Spitalit të Mitrovicës, Nita Mustafa.

“Për momentin katër policë janë të plagosur por që janë jashtë rrezikut për jetë. Tre prej tyre janë duke u trajtuar në Emergjencë dhe njëri në Kirurgji”, tha ajo.

Mediave kosovare kanë raportuar se janë dëgjuar të shtëna me armë zjarri në Zubin Potok dhe në zonët përreth tij. Krismat e armëve janë dëgjuar edhe në fshatrat Varage dhe Zupç ku janë mbledhur edhe qytetarët.

Tensionet janë transmetuar menjëherë në Beograd ku Radio Televizioni i Serbisë raporton se presidenti Aleksandar Vucic urdhëroi vendosjen e të gjitha njësive të Forcave të Armatosura të Serbisë në gjendje të plotë të gatishmërisë luftarake, ndërsa drejtori i Zyrës për Kosovën në Qeverinë e Serbisë, Marko Gjuric, tha se situata është “dramatike”.

Për aksionin kanë raportuar edhe mediat në Serbi. Sipas Tanjug, Njësitë Speciale kanë arrestuar 13 persona në këtë aksion i cili ka filluar në orët e hershme të mëngjesit. Po kështu janë arrestuar edhe disa policë kufitarë në zonën e Leposavicit mes tyre komandanti i Zubin Potokut. Ndërkohë, dy nga të arrestuarit në aksionin e veriut tashmë janë dërguar në Inspektoratin Policor të Kosovës.

Pas përfundimit të aksionit të njësive speciale të ROSU në Veri të Kosovës, KFOR ka filluar patrullimet nga ajri për të vrojtuar situatën e sigurisë në këtë zonë.

Helikopterët e KFOR po patrullojnë në Veri të Kosovës, ndërsa më herët u shprehën të gatshëm të ndërhynin nëse do ju kërkohej një gjë e tillë.

Zëdhënësi Vincenco Graso ka folur për mediat serbe duke u shprehur se aksioni i Policisë po zhvillohet me urdhër të Gjykatës së Prishtinës. “Operacioni i Policisë po zhvillohet në të gjithë Kosovën, jo vetëm në veri dhe nuk është kundër serbëve, vetëm kundër personave të dyshuar për krim dhe korrupsion”, ka thënë Graso. “Ne tani për tani përcjellim situatën, jemi në kontakt me autoritetet në Prishtinë. E kemi thënë edhe më herët, ne nuk përzihemi në aksionet e Policisë, derisa nuk na kërkohet të intervenojmë”.